The Catanduanes Tribune


Vol. XX No. 46	January 24, 2001	Virac, Catanduanes

Headlines

Major Developments

The Catanduanes Tribune

Rawis, Virac

Catanduanes,

Philippines - 5001

Tel. No.:

   (052) 811-1267

   or 811-2640

Fax No.:

   (052) 811-1267

E-mail:

Cattribune@cs.com



Publisher-Editor

Edwin A. Gianan

Advertising-

Circulation

Manager

Simeon G. Cueno

Web Master:

Richard T. Revelar

Calgary, Canada

Isip-Ispon Ta

ki Tang Tacio

Goodbye, hirap?

Dacula an pangaturogan kan mga tawo na mili naglayas na si Erap sa Malacanang, marahay na an pagbuhay sa Pilipinas.

Dacul man an madisgrasya kan salang pag-isip na ini. Minsan pirang People Power pa an ilansar sa EDSA, dae kitang mumugtakan kung cadaclan sato mapabacal nin boto cada pirilian.

Tama si Msgr. Ping. Baco sanang boto an satuyang ipinapabacal cada eleksyon kundi pati an satong mga calag. Nasabotan ini kan mga nagrally kan Viernes.

Kun naheling nindo, kan sabihon ini ni Msgr. Ping, dae nagpalakpak si Congressman Jun. An cairiba caining mga sagin-sagin, puminalakpak man. Alagad, isi man sana nindo kun siirisay an nagbacal nin boto sa mga naca-aguing eleksyon. Halos gabos, pati na itong habo cotana magtaltag nin cuarta natentaran man guiraray ni Satanas.

Noarin daw kita makanagbo nin candidatong tunay na qualificado, na dai masarig sa cuarta tanganing ma-elegir sa puesto? Noarin ta daw mapatunayan na hinog na an taga-Catanduanes para sa tunay na demokrasya? Sisay daw an maisog asin honestong calag na ini?

Duwang ina an nagduman sa harong asin nagreclamo laban sa sarong pasugalan diyan sa Rawis.

Ini daang pasugalan na ini pagsadiri nin sarong security guard sa hardware asin an agom caini an nagmamanejo kun banggui. Magpoon alas ocho nin aga hanggan ala una nin maaaga, sige an tong-it. Big-time daa an tong, caya minsan na ini pinatunong na daa ni Col. Remo, sige pa man siempre.

Comosta na capitan? Puede ka pa daw na makalakaw pasiling sa sugalan na ini tanganing ma-inspection an duwa hasta tolong lamesa nin adik sa sugal cada aldaw?

Igua pa cotanang mabali sa rally kan Viernes. Alagad kan maheling na nagmartsa man an iba niatong bida sa politica, dae na sana.

Masakit man daang pag-isipon na makurahaw kita nin “Erap, Resign!” pero an ibang mahabas nin perac tawo cabale man sa pagkurahaw niato. Sabi ngani, saro man daa sindang dapat pahare-on.

Caya an simbahan dae dapat magpondo sa pag-reparo sa mga sungayon na carbaw na ini. Magplano kita nin sarong rally na an mga kandidato masumpa sa atubangan kan tawo na nunca sinda mabacal kan satuyang boto, masqui “buy now, pay later” plan.

Kun aco candidato, mabacal na sana aco nin membership sa Red Cross. Nacatuwang ca na sa mga proyekto kan PNRC lalo na sa panahon nin calamidad, nataw-an mo pa nin insurance an mga votante. An problema sana, kun gusto kan tinawan nin perac, dapat na magparigis sinda sa Donabet, he! he! he!

Herac man ni Senador Tatad. Maorag na taga-Catanduanes cotana pero dae pinagana an dunong kundi an gulang.

Kunsabagay, dapat pa nganing magpasalamat an banwaan sa satuyang senador ta kun dai niya sinabi na pagbotohan an pagbukas kan second envelope ni Jose Velarde, dai pa seguro tapos an impeachment trial.

Pag-abot caini sa Catanduanes, taw-an ni medalyang ketse nin Ginebra hale ki Leon. Libreng estar sa Monte Cielo nin sarong bulan, libreng sakay sa ferry boat pa-lawod, bago ihulog sa tahaw nin dagat, he! he! he!

Sa wakes, magkaka-igua na nin bag-ong manager nin FICELCO. Tapos na an paglaom ni Manuel Luis Sanchez kan NEA na itao an kooperatiba ki Bagsak. Sa pagtukaw ni Nang Luya, malampaw na si Manolo sa puesto. Kung mangaen ini, dai ta isi. Tibaad magcandidato na sana bilang congressman ni Hector. Sanchez-Sanchez vs. Santiago-Alcantara vs. Verceles-Verceles. Norte laban sa Sur laban sa Norte. Helingon ta kun an tawo magboto baco sa nagtaltag nin perac kundi sa capacidad kan candidato na ibangon kita sa tamaw.