|
|
|
ISIP-ISIPON
TA ki Tang Tacio Pulis Ni Popa? Grabe na an helang kan liderato kan local na pulis. Dae pa daa caini nadangog an bareta manungod sa loteng o "first-two." Dae pa daa caini naheling na iguang mga nagpapataya sa palibot kan poblacion nin Virac. Dae pa lamang daa ini nag-report na iguang ilegal na pasugal sa saendang nasasakopan. Tutal, oro aldaw nagcocontribuir na kita sa mga pobre asin naluluging mga dealer nin gasolina, baco man segurong magabat sa bulsa na guiraray mag-ambag para sa cuerpo de policia. Sarong baseyong cajon nin Ginebra an guibohon na donation box. Icahang diyan sa atubangan kan lamesa ni hepe tanganing maheling caini an pagmawot can tawo na tabangan an saiyang daeng sukat na campanya sa ilegal na pasugal, he! he! he!
* * * * *
Nag-raid man palan an satuyang mga pobreng pulis. Pa-ending ogaring an napagdiskitahan, pwe! Pinalibutan daa an sarong lugar diyan sa iguang ki Balolo sa Sta. Cruz ta igua daang capitalista nin ending. Tama daa an impormasyon kan pulis. An problema - iguang gadan an nasabing para-pa-ending. Caya kan hakboton kan pulis an mga soboot evidenciang cuarta, nasacob daa an abuloy sa tigbak, pwe! Puro na sana guno an nabanwit kan mga pulis. Dae lamang nin malasugui diyan? Ano daw ta dae nadadacop an big-time na parapataya sa mercado (bacong si Orly)? Dae man daa puwedeng dae maheling an capitalistang ini, ta talagang dacula, he! he! he! Hanggan sa krimen, mga tugang, lamang man guiraray an may perac, pwe!
* * * * *
Igua daang osipon na an sarong halangkaw na opisyal kan PNP guinigibo daang olonan an sarong babayeng invuelto sa droga, he! he! he! Inda daw kung totoo ini, pero kan magraid dae pa nahaloy sa Sta. Elena, an suspetsado daa inakboy ni hepe, pinasakay sa aircon na kotse asin duman sa quarters pinacaturog (nagturog daw?). Mantang an ibang nadacop, anas mga macho, isinakay sa mobile asin inola sa carcel, malipot na bacal an hapiyap hanggang aga, herac man! he! he! he! Bihira na daa ngonian an toltol na commander kan mga tropa de policia arog baga qui Col. Antero Javier o ki Col. Ireneo Manaois. Caya kung igua man nin masalida sa presenteng jefe, tabi man na magpa-novena na dai kita padusahan ni Heneral Lacson nin veterano sa delihens, pwe!
* * * * *
Ini daang Arabong ini, nag-abot digdi pirang bulan na an naka-agui. Pinagsobre an sarong bag-ong sasakyan alagad ibinangga man kan driver caini. Natural an cagsadiri, mahagad nin danyos perhuwisyos. Sa panuga ni candidato, dinara an awto sa Manila para hingayadon an napasang nguso. Alagad uminabot an singil kan casa sa halagang cincuenta mil. Dagos daang nag-issue nin post-dated na tseke an bida. Ngonian ka, dai man nag-oho an casa na postdated an ibayad, caya hinalat an aldaw asin pinagdeposito an tseke ni Arabo. Talbog, mga tugang, an hambog na tseke. Herac man an kotse, na-stranded sa Manila masqui daeng bagyo, he! he! he! pwe! Hoy, kung dae ka man sana makabayad kan saimong danyos perhuwisyos, dae ka na tabe mangaturogan na magsirve sa banwaan, pwe!
* * * * *
Style sana ini, mga tugang, tanganing dae mahalata kun pabor qui Erap an saendang boto (bacong saimo) sa impeachment. Baco man ining mga santo, an cadaclan man caini mga advance an isip. Advance na commission, masqui delayed an bidding, pwe! Pareho man sana ini can mga macaherac na calag sa Lower House, mga advance man an utak. Naheling na can mga ini na mahulog na si Erap, caya kanya-kanyang ralampawan sa M/V Estrada. Dae aco matubod na sinda naghiwas dahelan sana sa interes kan publico. Noarin pa man an mga ini nagtrabaho solamente para ki Juan de la Cruz? Kan sinda satuyang itukaw sa trono matapos na bacalon an satong boto (bacong saco), an primerong naglaog sa mga isip caini iyo an pan-o makabawi. Caya kung nangaturogan ka man na toltol man palan an mga congressman (bacong gabos), pagmata na ta tibaad pangom-omon ka, pwe!
|
|||||||||||||||||||||||
