ISIP-ISIPON TA

ki Tang Tacio

Quarrel Like Brothers

An makahulugan na mensahe ipinaabot kan simbahan sa pagselebrar kan ika-60 compleano ni Msgr. Ping Molina sa ICSA. Mawot daa kan mga pade na an duwa niatong mga lider - si Gob asin si Cong - mag-iriwal sana na baguing magtugang. Baco na singhal dindi, moda duman, kalmot dindi, sipa duman, damay pati banwaan, pwe!

An gustong sabihon ni Msgr. Ping, satuyang guiromdomon asin ivuelta an kapanahonan na an lambang ciudadano midbid an lambang saro y nunca ini mapacolog sa saiyang midbid personal.

Ano daw lamang daa kung camong duwa mag-orolay sana nin toltol, daing mga maraot na guibo asin malanit na pananaramon. Tibaad lamang matoninong nin diit an satong mga isip. Halat mi an simbag nindo.

* * * * *

Kun tama an sinabi kan naka-diskubre, an cabangang litro sa 22-litros minaluwas na sobra sana sa cuarenta sentimos cada litro an satuyang pinagdodonar sa mantoc na manager caini.

Dai pa ngani ini macabacal nin sarong White Rabbit, caya dai sana daa magpareclamo ta minsan ngani na daeng mai-oli an cajera, tatawan ka man nin dolce, he! he! he!

Caya dapat na maghagad asin amoton an mga resibo sa Caltex asin Flying A tanganing igua kitang nasaray na imo sa saindang banco. Singilon ta na sana sinda kun an deposito mag-abot na sarong milyon, he! he! he! pwe!

* * * * * *

Cabale daa sa walo an satuyang kahimanwa na si Senador Kit Tatad kan Gigmoto. Dae man seguro ipasupog caini an Catanduanes sa pagdangog kan impeachment hearing ngonian na Deciembre.

Pero an problema, kun mapatalsik si Erap, saen na daw ini madalagan? Politica an buhay caining satong tugang asin segurado aco na nunca caini babayaan an vida politica. Puedeser na magiging maogma an ralaban sa 2001.

* * * * *

An saiya daang aqui dae na nacaca-adal sa library sa dahelan na an mga maestrang contra ki Principal Crispino, duman daa sa library an headquarters. Bagui daang daing ibang tawo sa library ta mga macusog daa an mga boses caini, naestorbo na daa an mga estudyante.

An reparong ini dae nangangahulugan na contra ini sa saendong ipinaglalaban. Alagad, mas maray na an satuyang campanya sa pagpatalsik ki Sir, baco na guibohon sa mariboc na paagui. Konting pino daa, mga ser, mam!

* * * * *

Mag-import kita nin daracula asin magagayon na gadya sa ibang nasyon. Igakod asin tawan nin maray na estaran sa subdibisyon. Pacaonon nin humba asin lechon cada aldaw y darahon sa clinica cada semana, he! he! he! pwe! Dae na kita magcaraon, itao na sana sa ataman na gadya, pwe!