ISIP-ISIPON TA

ki Tang Tacio

Ploteng casino

Sige daa an bola sa loteng. Napundo sana kan magbagyo nin duwang beses sa laog nin sarong semana. Off-line an mga tayaan sa lotto asin daeng cable o diyaryo caya daeng nangahas magtaya.

Sa laog nin duwa o tolong bulan na punan ini, dai lamang ki sarong report sa satong cuerpo de policia manungod sa ilegal na pasugal na ini. Ni saro? Imposible, mga catugangan, caya duwa sanang bagay an makapaliwanag caini.

Posibleng dai talagang intelihensiya (intelligence) an satong mga pulis o igua na an mga ini nin delihensiya (dilihens), he! he! he! pwe!

Kung dai man sana ini kaya ni chief Rosero asin Col. Gonzales, tabangan ta na sana si gambling lord na maging miyembro kan junta provincial. Itao saiya an comitiva sa Ways and Means ta kung baco siyang wais dae siyang means macacoa nin perac sa pobre, he! he! he!

Posible man na bacalon caini an floating casino ni Stanley Ho hale sa Macao (kun dae itinumba ni Seniang), asin ido-ong diyan sa pier kan Virac. Entonces, igua na kitang dagdag na tourist attraction, an "P. Loteng Casino," hak! hak! hak!

* * * * *

An mga eksperto sa rabis sa Albay nagngalas daa kun ngata biglang nagdacul an victima kan helang sa Catanduanes, na kan naca-aguing walong taon ni sarong tawo an nai-report na kinagat nin rabyadong ayam.

Sabi ninda, posible daang an ginikanan kan rabies iyo mismo an pagbakuna na ginibo kan probinsiya mga pirang bulan bago naglacop an helang nin gadya.

An bolong na ginagamit sa pagbakuna, segun sa mga eksperto, dapat daang ilaog sa refrigerator na an ripot dae mahababa sa 4 degrees Centigrade. Alagad, kung maguiguiromdoman niato, halos pirang beses oro-aldaw an brownout sa islang ini. Caya posibleng uyag nang vaccine an naggamit. Posible man daang kagidon y maniwang pa sa tolang an ayam an pinagbakunahan. Segun daa sa regulasyon, dapat mga gadya sanang maray an salud o daeng helang an dapat bakunahan. An mga tibihon, binadil na sana cotana. Ini sa rason na kun hilako nang gadya an bakunahan, posibleng madaog kan rabies virus na nasa vaccine an resistensya kan ayam. Natural, malacop an virus. Ngonian, nangyari daw ini sa Catanduanes?

* * * * *

Pinagkritika palan ni dating Gob. Beroy Alcantara an presenteng lideres kan banuaan dahelan sa pag-iriwal caini. Imbes daang mag-asenso an islang Catandungan, lalo lugod na nabilho sa lab-ogan.

Itinao ni Gob. Beroy an saiyang mensahe sa awarding ceremonies kan The Outstanding Catandunganon Award (TOCA) kan Octobre 24 sa capitol dome bilang espesyal na aktibidad sa ika-55 anibersarsyo kan probinsiya.

Dagos man daang sinimbag ini ni Gob Hector, binasol si Congressman Jun Verceles sa pagpoon kan giyera sa politica. Seguro kung aduman si Dayunyor, dae na natapos an programa sa pasimbagan sa mikropono, he! he! he!

An gustong sabihon kan saro, dae ka daa makialam sa baco mong poder. Entonces, dai ka tabing pakilabot kung aco corrupt o igwang advance SOP hale sa sacuyang contractor. Dai man acong paquilabot kung ika gahagad man nin diyes porsiyento sa saimong contractor o kun an cada guibo mo pirming palso. Dapat daa deadma sana, hak! hak! hak! pwe!

Ini mga tugang an lacop na ngonian sa Pilipinas - dae sana daa makialam sa baco mong tuwad. Alagad, an saendang pinagkakawatan satuya man sanang cuarta, kaya dapat kitang makialam, lalo na kung dai mo man ipinabacal an saimong sagradong boto (bacong dara-dara) sa naca-aguing seleksyon.

Hilingon nindo, baco sanang NPA asin rabies an nagkakalat sa islang ini ngonian. An pagca-hogacon y maisipon kan mga binotohan tang kagawad sa junta provincial buminaba na sa municipio kan Calolbon. Dae man lugod ini maka-olakit sa iba pang banuaan. Dae na pong bolong an helang na ini. Kung matubod camo saco, regalohan nindo ngonian na Pascua an mga tablad na servidor nin publico nin bala sa badil, horo-halabang pisi, sarong botelyang sosa, o rabyadong gadya, he! he! he! pwe!