|
Nagcodigo
si Sir
An
campanya kan pulis ni Col. Panen laban sa ilegal
na sugal sige pa man daa magpoon kan maisihan
kan jefe na padagos an pa-lotteng sa Virac. Inda
ko sana kun nasupgan si Panen sa guinibong
summit sa illegal gambling kan maisihan niya an
bagay na ini.
Maguiguiromdoman
na sinabi niya na mismong si operador Natalio
Popa an nagpromesa na dai na ma-operate kan
lotteng. Ngonian, minaluwas na sagin-sagin sana
an promesa. Sabi ngani kan mga parapataya,
secreto sana daa ta duwang aldaw man sana
sindang nagtunong. Nakuryente si jefe, he! he!
he!
Iyan
an resulta kan sainding policy na kahuronon na
sana an mga minaguibo nin ilegal na aktibidad.
Kun talagang kamo mga pulis y an seryoso sa
trabaho nindo, nunca kamo makinegosasyon sa mga
para-ilegal. An dapat, dakupon asin icarcel an
mga ini. An problema sana, dae ta isi kin si
jefe Panen dae invuelto sa pagproteger kan mga
para-jueteng sa mga hinalean niyang destino.
Ano
daw, jefe, tunay na daw an campanya sa mga
ilegal o sige sana kitang papogi sa media?
Kan
nacaaguing semana, sarong kagawad kan municipio
nin Bagamanoc an pinaapod kan pulis asin DILG sa
saro daang dialogue asin pinasumpa na itutunong
na an PBA ending raket caini. Nagsumpa man daa
an daing calag na consejal, si Nelson Peralta.
Sabi co ngani, ini an masakit sa satong
awtoridad. Pag dacula na an kalaban, horon-horon
na sana an ginagamit na solusyon. Justicia, mga
tugang, an kaipuhan, bacong pasensiya, pwe!
Hilinga
si Popa, an sinabing operador kan `lotteng.'
Nagkandidato na bilang vocal sa West district,
igua pa nin kusog nin boot na magpresentar ki
Santiago asin Verceles bilang kapartido, pwe!
Sabi ngani, dae man daa caini kaipuhan an
partido, ta siya igua na - an PNP, he! he! he!
pwe!
Nagmuroto-muto
an cadaclan kan pulis sa Virac sa pagtrato sa
sainda kan mga politico. Nagsacrificio na daa
sinda na magbantay kan traffic y mag-escort sa
daeng supog na mga visita, sinda pa an sasalaon
y aacusaran na iguang kinikilingan na candidato.
Natural
ini, mga nonoy, kung an cuerpo de policia digdi
sa enterong Pilipinas ginagamit kan mga VIP
(very important pig) sa masqui ano na sanang
bagay. Kulang na sana na sinda an magpahid kan
duhay kan mga VIP.
Kan
sarong semana, baco pa nganing elegido si Evelyn
San Ramon-Yumol bilang congressman, pinagtaw-an
na nin escort. Posibleng mahal an bayad caini -
tsokolate, sigarilyong blue seal asin pahamot
para ki jefe, he! he! he! pwe! Caya kun an
pobreng ciudadano mapa-iba man sa bayle sa Dugui,
tabi man na apudan an campo Camacho tanganing
magca-igua nin escort. Magbayad sana nin sarong
sakong hope o camonti, he! he! he! pwe!
Baco
sana palan na mga estudyante an mahilig sa
codigo.
Sa
sarong computer shop sa banwang Virac, igua
daang pinagpaxerox na copya kan mga question sa
eksamen kan mga maestra. Dae niato na-confirmar
kun talagang an mga xerox copies gagamiton sa
eksamen o itatao sa mga mabayad na maestra.
An
District Achievement Test, sa pacahona ko,
guiniguibo tanganing maisihan an tunay na
capabilidad kan satong mga teacher. Kun daya an
pag-eksamen sa mga maestra, baco man na totoo an
maluwas na resulta. Caya ngani pinagbawal ni
Secretary Roco an gabos na mga review sa
escuelahan, tanganing magluwas an tunay na
kundisyon kan utak kan satong mga aqui.
Supt.
Beloso, pakireparo man daw kun totoo an tsismis
na ini!
|
