 |
||
| Vol. XX No. 45 |
January 17, 2001 |
Virac, Catanduanes |
|
||
|
The Catanduanes Tribune Rawis, Virac Catanduanes, Philippines - 5001 Tel. No.: (052) 811-1267 or 811-2640 Fax No.: (052) 811-1267 E-mail:
|
|
Publisher-Editor Edwin A. Gianan |
|
Advertising- Circulation Manager Simeon G. Cueno |
|
Web Master: Calgary, Canada |
Isip-Ispon Ta
ki Tang Tacio
Ibagsak
an Ficelco
Dae man guiraray minahababa an presyo nin sila sa mercado.
Sabi kan Sangguniang Bayan, dae daa ngona magbacal nin sila an mga tawo. Magpasensiya ngona daa sa carne ta P85 sana an kilo. Durodagdagan an bangot na hope o anuman na marhay na verdura. Kung dae macabacal nin onod o gulay, ayunan nin Calcibloc, masilam na, libre pa sa high blood, he! he! he! pwe!
Segun ki Kagawad Vir Candelaria, an mga middlemen o parasimber nin sira an nakapamahal caini. Segun sa research, an landed cost o presyo can sila paghaw-as sa Bote minaabot sana sa otsenta para sa first-class, nobenta kung calaen an panahon.
Entonces, mga tugang, an presyo kan malagono, tanguigui, baraca, malasugui, malaguimango, calpion, talakitok, bancolis y lapu-lapu
nagda-dagdag nin cincuenta porciento paglagpak caini sa saod o talipapa.
Pareho man an nangyayari sa second-class na sila arog kan bocawon, atoloy, sibubog, balanac, manabang, sandig, cataway, maya-maya, bighu asin talotoon. An ku-a caini sa Bote P60 hanggan P70 an kilo alagad an pabacal sa tiendahan ni consejal sanggatos na.
Caya an mga pobreng parabacal nagtitios na sana sa tercera claseng sila arog can duwal, tilapia, manitis, bugiw, turingan, canasi, guribas, angol, bulangawan, asin binombahan na dalagang bukid. Igua pa man nin minapasensiya sa patona, surahan (lalo na an mga walang tamoy), turay, dorado, lapis, langkoy, cogita, riliw asin ilid-ilid.
Sa pagrebisa kan ordinansa sa presyo nin sila, na pinag-aprobaran pa kan 1994 kan an dolyar nasa P30 pa an tocal, dapat na sigurohon na an mga parabacal dai mabayad nin halangkaw y an mga parabanwit dai man nalulugi.
Bahala na an mga parasimber sa saendang presyo. An importante, an halaga nin sila sa saod dai malampas sa inaprobaran na ordinansa. Ngonian, an hapot: caya daw ining ipasunod ni Amus o kan oficina ni Cito lalo na ngonian na harani na an eleksyon?
Sobra talaga an delihensiya sa pagsimber kan sila.
Kung camo ma-agui diyan sa highway sa San Vicente, halos sampulong lamesa nin paratienda an nakahilera sa sidewalk. An cadaclan caini baco man na parabanwit kan San Vicente an maysadiri, kundi mga taga-ibang lugar sa Bato.
Ano daw kun reparohon man ini kan oficina ni Mayor Cito? Sa pagheling co, parehas man ini kan mga talipapa na nagcocoa nin lisensiya diyan ki Rey. Dapat patas sana an laban. Mahal na ngani an pigtitiendang sila, dai pa mabayad sa mayor’s permit. Hoy, maghiwas man camo!
Nasapawan daa ni Junior an satong NTC commissioner sa naca-aguing inagurasyon kan Smart PCO sa San Miguel.
Dae man daa ini invitado sa pagtagbo sa visitas alagad iyo an nangenotan sa landing. An resulta, dae na daa nagtagbo si Santiago asin si Cito, duman na sana sa Gogon naghalat an mga hikayon, he! he! he!
Dae ta man mabasol an congressman. Tanda sana ini na si Jun veterano nang politico. Dae nang supog, he! he! he!
Herac man kan duwang candidato sa pagca-general manager nin Ficelco.
Kumbaga sa karera, harani na sinda sa finish line, bigla na sanang pavueltahon sa kapooni.
An bag-ong amo daa kan NEA, si Manolo Sanchez na taga-Pandan, an may pakana na buksan giraray an proseso sa paghanap nin tocal ki Segundo Gianan, Jr. na nasa America na. Segun sa mensahe kan NEA, dapat daang taw-an pa nin pagkakataon an ibang aplikante sa posisyon. An problema, saro man sana daa an pinaghahalat na sobra an interes sa GM – si Bagsak na kadugo ni Manoy Hector, he! he! he! pwe!
Dae ta masabotan kun ano an rason kun ngata gusto ni Manolo itong “trusted” niya. Baco man siguro itong “trusted” sa deligencia, he! he! he!
Sayang na dae pina-apod kan awtoridad si Col. Panen sa hostage-taking sa Salvacion. Nag-atender man daa cotana ini nin training sa hostage negotiation. Naheling man duman an mga kakulangan kan satong cuerpo de policia sa mga siring na sitwasyon. Kulang an crowd control, dacul an usisero y dae lamang nabawalan ini magharayo tanganing dae malasayan kun an sitwasyon magroro. Dapat iguang tunay na sharpshooter an local na PNP na an gamit bacong revolver kundi halabang badil na may teleskopyo. An cada semanang lagay sa loteng, puede na segurong ibacal nin ripleng ini. Ano daw, mga pulis ni Popa?
Sarong local na contractor an nagreclamo manongod sa pasemento ni Senador Kit Tatad sa Catanduanes.
Saiya daang narereparo na an mga contractor caini hale sa Albay. Ano man daa an diferencia ngata ta dae tinataw-an nin halaga ni Kit an mga local na contractor? Ngata daa ta dae pino-protectaran kan senador an saiyang kahimanwang negosyante, arog kan guinibo ni Lesman, Uban asin Pay Ente kan saindang kapanahunan?
Sabi kan espiya, treinta porciento daa binawas na advance sa contractor para sa SOP. Caya an nahahaman kan sarong milyon maabot na sana sa 160 metros na concreto. Bacong arog caidtong hanggan 300 metros an laba kan nahahaman.
An leksyon caini, mga tugang, kitang mga votante dae na man magparahagad nin cuarta sa mga politico lalo na kung eleksyon. Diyan sa SOP pinagdidisponer kan politico an cuartang pangmantener asin pangsustener sa votante asin alalay. Dae na camo kaan magngalas ta mga bayad na man camo, pwe!
