The Catanduanes Tribune


Vol. XX No. 43	January 03, 2001	Virac, Catanduanes

Headlines

Major Developments

The Catanduanes Tribune

Rawis, Virac

Catanduanes,

Philippines - 5001

Tel. No.:

   (052) 811-1267

   or 811-2640

Fax No.:

   (052) 811-1267

E-mail:

Cattribune@cs.com



Publisher-Editor

Edwin A. Gianan

Advertising-

Circulation

Manager

Simeon G. Cueno

Web Master:

Richard T. Revelar

Calgary, Canada

Isip-Ispon Ta

ki Tang Tacio

Noarin pa?

Baco nang marhay an dalagan kan DECS division office sa pamamayo ni Iyay Nelly Beluso. Mas listo pa daa an caidtong si Fanio Buela, na nanggana ngani bilang outstanding supervisor sa nasyon kan ini magtransfer sa Albay.

An bag-ong milagro, baco na daang si Tubale, an cajera, an nagtataltag nin bulanan na tseke kan mga maestra. An planning officer daa an tinawan kan trabajo, caya iyo na ini an nagdidistribuir kan cuarta minsan baco ining bonded official.

Minsan daa, sabi kan espiya, minuta an mata kan mga supervisor sa kahahalat kan tseke sa oficina ni Tubale. Daing nag-abot na cuarta dahelan ta dara na palan ni Iyay Ester sa cada district.An supply officer man daa, nawawaran na man nin trabaho ta an sugo ni Bisor Nelly iyo si Manay Ester sa pagbacal nin materiales asin iba pang gamit, lalo na sa Legaspi.

Kung dai nang tiwala an amo sa saiyang mga subordinado, dapat nang haleon an mga tamad na ini tanganing dae na man mag-isip an mga maestra kung sinda igua nin caso sa Ombudsman. Tawan na ni Iyay Nelly nin blancong resignation letter iguang caibang dolce de lemon tanganing baco man na macolog sa boot, he! he he!

Mabilis pa sa alas cuatro an cuerpo de policia kan mahabonan an sarong misyonerong Mormon diyan sa apartment ni dating Jorge Arcilla (tabangan nin Diyos).

Dae pa nagcabangang semana, solb na an krimen, nacoa na an mga gamit. Caya camo, mga tugang, kun camo mavictima nin Lupin diyan sa San Isidro Village, tabi man na pakipamidbid na ministro nin El Shaddai o Iglesia ni Cristo. Dae pa ngani mainit an lobot kan mga Lupin, adyana an mga pulis, pwe!

Ngonian ca, iguang chismis manongod duman sa harabasan ki ex-mayor. Saro daang babaye na invuelto man sa ilegal na droga an lo mismong ga-gawgaw kan mga kagamitan sa mga Lupin, he! he! he! Siguro, kulang pa an pangpiyansa sa saiyang kadugo sa carcel.

Sarong bulan na sana, maiisihan ta na kung sisay an mga ma-entra sa politica sa pobreng islang ini.

Sa Congreso, sigurado na si Cotipyo pero dai na daa madalagan si Bro. Rene Velarde. Ngonian, sisay na an kalaban ni Santiago? An sabi daa posibleng mapilitan si Congressman Jun na isabay an saiyang agom na si Natsy, alagad malaen na paghelingon ini.

Calaen na sa mata, macolog pang pag-atid-atidon. Dae na lamang diyan nin maayad-ayad? Sa Manila an estar caini, mga tugang, baco man masakit na pag-isipon na kung an duwang ini an macaluwas, parehong gobernador asin congressman an dae sa probinsya sa cadaclan na oras. Kung sa Caramoran, un vez cada bulan kun magpaheling an bise mayor, inda sana sa probinsiya kung inano an lasbot kan mag-agom cada semana.

Kung madagos an planong ini, posibleng saro sana an macaluwas. Kung abuton nin kamalasan, duwa pa, he! he! he! Kung sabagay, dae ta nigaran an inpluwensiya kan perac ta an mga votante sa sato nababacal pa an boto (bacong dara-dara). Malaog pa sana sa precinto, igua nang laog an bulsa, pwe!

An nangyayari sa nasyon, dae ta lamang pag-guibohon digdi sa probinsya. Helinga na an nangyari sa junta probinsiyal, nabanga sa duwang lado asin parehong nagse-sesyon, pwe! Igua man cotana nin presiding officer na dapat iyo an magmanejo kan dalagan caini, pinagrangca an saindang sasakyan.

Noarin daw maabot an panahon na an cadaclan na votante matao nin oras na pag-isipan an saiyang isusurat sa balota? Noarin daw kita macaheling nin congressman na bacong advance an SOP? Noarin daw magcacaigua nin toltol na Sangguniang Panlalawigan asin mahigos na gobernador? Noarin daw matapos an pirmi na sanang hampangan sa politica ni Cito asin Ribong cada eleksyon? Dae na lamang diyan nin mga ma-ayad-ayad?