Isip-Isipon Ta

ki Tang Tacio

Mga kapay

Sabi kan mga para-reparo, dapat daang irehistro ni Ursus an Sangguniang Panlalawigan bilang swine breeding center sa Department of Agriculture, he! he! he! Sayang daa an pagkakataon ta maibalangibog sa bilog na ronang Bicol na igua kita sa capitolyo nin mga primera claseng mga orig, patabaon man o mga pakal.

Libre na sa helang (binakunahan ni Dr. Rabies), maray pa an mga kulungan caini, cuntodo tayls asin marmol. An bahog, rinibong kilo nin sinsilyo hale sa among politico, pwe! Caya lang, panahon na para sinda ipabacal sa Mayo 14, sobra na sa taba, he! he! he! An pacal, dae na man ma-obra ta menopause na, he! he! he!

An banwaan dapat na maherac na man ki Ursus ta dae na caini caya na rendahan an mga ataman sa tangcal. Salidahan na nin litson, mga 45 dias pa sana sa politica, kulang pa an kagid, he! he! he! Medyo macabawas pa kita sa gastos ta kulang man an habhab, bacong arog ngonian na masqui anong oras minatak-ab, pwe!

Nagtriunfo an mga daeng supog sa Congreso.

Puede nang magcandidato an senador o congressman sa ibang puesto na dae mahale sa saindang pagca-miyembro kan Congreso oras na mag-file kan saindang certifico. Entonces, manggana o madaog ini, ma-representar pa daa ini kan saindang mga distrito masqui recess an Congreso sagcod Junio, pwe!

An daculang epekto caini, mga tugang, kun madaog an sisay man na congressman na nag-ambisyon maging senador o gobernador sa Mayo 14, igua pa ining matatadang 45 aldaw na tapuson an pagcolecta kan SOP, soloon an mga evidencia kan paghabas kan fondo nin banwaan y an mga kagamitan na ipinundar hale sa kaban kan banwaan maibalyo sa saiyang pangaran. Anong suwerte kan mga buwaya, pwe!

Sa heling nin cadaclan, dai pa napapanahon na manggana an sarong candidato na nunca matao nin perac sa mga votante.

Sa pagca-miyembro nin consejo, posible pang mangyari ini. Pero sa mga halangkaw na puwesto arog kan bise mayor, mayor, bise gobernador, gobernador asin congressman, daculang milagro kun an sarong pobreng candidato iyo an macaluwas, lalo na kung macalingaw maghangos an saiyang mga kalaban, he! he! he!

Alagad, maray na mapoonan kan kun sisay man na iguang kusog nin boot asin qualificadong maging tunay na servidor nin banuaan. Sa ngonian, an minalaog sa mga halangkaw na puesto, baco na kaban ni Juan de la Cruz an pinapano kundi an sadiri nindang bulsa. Tunay na kapay kitang mga votante sa Catanduanes!

Halos completo na an line-up ni Commissioner Santiago.

Nangyari an negosasyon sa laog nin duwang semana. Sabi can sarong espiya, si Santiago an para congressman, si Gob Hector sa dating puwesto y si Severo Alcantara, Jr. para bise gobernador.

Minsan sa pagheling can cadaclan na bacong magayon an Santiago-Sanchez, napiritan man guiraray an commissioner na akoon an pakihoron kan gobernador. Maray seguro an offer, he! he! he!

Maheling ta kun hanggang saen kayang tampadan ni Hector an ipanaltag na cuarta kan saiyang kalabang mortal. Happy na naman an mga gutom sa perac, pwe!

Mavuelta kita sa perac.

Malaen na paghilngon na an satuyang mga kaakian, minsan joven pa, binabahog na nin cuarta nin politico. Ini daang campo ni Kuya Jun, sa saindang scholarship program na bayad nin banwaan, may ginigibo daang sala.

An mga minacoa palan nin eksamen sa programa iguang mga premyo. An maca-perfecto daa tinataw-an nin quinientos cada, an ibang iguang diit na sala, huruhababa an bayad.

Ngonian pa sana aco nacaisi nin scholarship exam na an mga topnotcher pigbabayadan. Sa saendang putot na kaisipan, an mga joven masasanay na maghagad nin bayad sa saendang performance. An cadaclan can magurang caini pobre caya herac man kun sa masunod na eksamen sa escuelahan, maghagad man nin quinientos kun masiento an eksamen.

Hoy, Junior, sala an gibong an. Kun an saimong katuyohan iyo na paogmahon an mga magurang caini y mag-asang dacul an ipamudmod mo sa Mayo 13, baco sana tabi an an saimong pinagdistroso sa comunidad na ini. Sarong minatubong henerasyon nin mga lideres asin ciudadano an saimong pinadadacula sa kaisipan na an gabos na bagay digdi sa islang ini nababacal. An maating guibo sa politica, hare man tabi pagdaraha sa laog kan escuelahan.

Masakit talaga an sanay sa cuarta. Cada hiwas, perac an caipuhan. Cada problema, papel de banco an pantapal. An pagheling sa cada nagrarani, perac an caipuhan, pwe!