The Catanduanes Tribune


Vol. XX No. 44	January 10, 2001	Virac, Catanduanes

Headlines

Major Developments

The Catanduanes Tribune

Rawis, Virac

Catanduanes,

Philippines - 5001

Tel. No.:

   (052) 811-1267

   or 811-2640

Fax No.:

   (052) 811-1267

E-mail:

Cattribune@cs.com



Publisher-Editor

Edwin A. Gianan

Advertising-

Circulation

Manager

Simeon G. Cueno

Web Master:

Richard T. Revelar

Calgary, Canada

Isip-Ispon Ta

ki Tang Tacio

Bulawan sa saod

Pacatapos kan sakyada sa harong ni defunto Mayor Jorge Arcilla sa Virac, medyo malipot na naman an campanya contra sa ilegal na droga.

Sa matindi (bacong si Bayani) asin maraot na tama kan shabu, dapat daing tunong an awtoridad sa pagdacop kan mga drug lord asin user. Lalong nagiging kaipuhan ini sa paglacop kan bareta na saro na naman na aqui nin meyor an ipinadara daa sa rehab. Ini kasunod kan pagsumang ni Virac Mayor Cito Alberto sa saiyang kaguranging aqui na magpabolong kan pagcalulong sa bato.

An aqui na ini nin ibang meyor iyo pa an municipal federation chairman kan Sangguniang Kabataan sa sarong banwaan.

Caya an mga magurang, satuyang pinapatanidan na manmanan nin husto an saindong kaakian tanganing dai sinda masala sa pagdacula. Pagpatanuson an pagdisiplina sa mga nakalingaw kan patakaran sa harong ta an kaluyahan caini, kaluyahan kan namamayo.

Pareho man ini kan makamurumundong nangyayari sa SP. Baranga an familia, dulak dindi, iriwal duman. Ngonian, haputon ta daw si Bise Gob. Al kun siya naging marahay na ama sa junta probinsiyal. Isi nindo siguro an simbag.

Kan Viernes, si Ursus, an soboot "provincial secretary," nagpadara nin noticia sa miyembro kan SP asin sa DILG na an SP magcacaigua nin "inaugural session" kan Lunes, Enero 8.

An hapot: ano man an dapat ipag-inagurar or ipagselebra sa consejong ini? An pagcabaranga kan miyembro caini na gabos igua nang ibang amo, baco an tawo? An daing cahamnan na existencia ngonian kan saindang ahensiya? O ang saindang kaogmahan na dai na mahaloy, campanya na naman, dae nang sesyon?

Sa noticia, mga tugang, marereparo na dae ibinale an pangaran ni PBM Fred Gianan, Jr. asin PBM Magin Isuela. An aduman lugod sinda dating PBM Jenor Sollegue (herac man) asin PBM (kuno) Eniong Romero, na minsan temporaryo sana ngani an torno, pinagpalayas na an mga casual ni Magin.

Dae ta lugod masabutan kun ining Ursus na ini talagang may adal o dai. Sa pagsabot ko, sa ngonian na panahon, dai na man nin provincial secretary. Presidente man cotana nin liga ninda, alagad lingaw na siya bacong secretaryo kan probinsya kundi kan SP, he! he! he! Nasobrahan nin Ursus! hak! hak! hak!

Dae na naman na-aprobaran kan SP an budget sa taon na ini kan probinsiya.

Sa laog nin duwang taon, duwang beses na guinibo kan hugakon asin siriblag na miyembros kan junta probinsiyal an dae pag-aprobar kan budget sa dahelan sana kan ventaje sa politica.

An lugi, an mga tawong nagbabayad nin halos treinta mil cada bulan sa lambang vocal, cabale si Alfredo Aquino. Saro pang lugi, si Gob Hector na dai naipasunod an mga proyektong para cotana sa tawo sa mga taon 1999 asin 2000.

An makikinabang, mga tugang, si Jun Verceles kun ini nanggad manggana sa Mayo 14. Pagtocao caini sa Hulyo 1, cabong-cabong na P100-million an pondo caini para sa mga proyectong an magcacanigong porsiyento mapasiring sa bolsa, he! he! he! Uha, alam na!

Ano na ini, bulawan na an presyo nin sira sa saod.

Bocawon, balanac, asin bangus, P120 an kilo. Mismong bugiw, nobenta. Ordinaryong bancolis asin malaguno, P140. Dai na mag-isip nin lapu-lapu ta sa ngonian na krisis an nakakaon na sana caan iyo an taga-Hongkong.

Dae na nin fuerza an gobyerno municipal na tawan nin magcacanigong solusyon an problemang ini. Ano lamang an maguinibo ta, mahalat na mag-guda sa bahura?

Magbacal ca man nin carne, an high blood? An gulay, ka-riog man an presyo. Mismong patatas, otsenta an kilo. Kulang man an gatanom sa satong mga comprovinciano minsan may vacanteng daga, mga tamad!

Caya an maray, imbes na bancolis, bacalon na sana an P140 nin walong sardinas. Walo man ining caraonan. Cada luto, iba an sahog. Ngonian, kalunggay. Sa aga, ogbos. Sa otro aga, hopi, he! he! he!

Kung padagos an pagroro kan economia, lalo na kung dai pa mabungcal si Erap sa Malacanang, lalo kitang maaburido kan paglangkaw kan mga presyo kan bacalon sa Mercado. Caya kung aco si Congressman Jun, puedeng i-proponer na guibohon na sanang dolyar nin Estados Unidos an cuartang gagamiton ta. Haleon na an piso, guibohon na panggatong, he! he! he!

Dacul na ventaje ini. Primero, mahababa an presyo nin sila asin carne. An lapulapu magiging three dollars, hababa talaga! An kibit asin incloso, mga one dollar and 50 cents. An problema sana, an sueldo can carpintero, four dollars na sana an aldaw.

Icaduwa, an mga Pilipino gusto nin US-made. Kun an cuarta ninda dolyar na, dae na ini mapila sa US embassy. An problema na sana, kun pan-o mag-snow sa Pilipinas, hak! hak! hak!

Kung dai ini mahacer, sabi ni Kamlon, mag-arquila nin supertanker sa Saudi asin guyodon na sana an islang Catanduanes harani duman sa California. Tibaad sa diez anyos, presidente na kan US si Jun Verceles, hak! hak! hak!